Ahil
கடந்த சில தினங்களுக்கு முன்பு நடிகரும், ஒளிப்பதிவாளருமான நட்டி ‘நடராஜன்’ நடித்த ‘TN 2026 – தங்க நட்சத்திரம்’ திரைப்படத்தின் டீசர் வெளியாகியிருந்தது. நடிகர் தம்பி ராமையாவின் மகனான உமாமபதி ராமையா இத்திரைப்படத்தை இயக்கி இருக்கிறார். இந்த திரைப்படம் வருகின்ற ஏப்ரல்-10 ஆம் தேதி வெளியாகிறது.
இந்த திரைப்படத்தின் டீசர் வெளியானது முதல், இப்படம் நடிகரும், தவெக கட்சியின் தலைவருமான விஜய்யின் அரசியல் வாழ்க்கை குறித்த படம் என இணையத்தில் பேசப்பட்டு வந்தது. அதுவும் அவரது சினிமா மற்றும் அரசியல் வாழ்க்கையை கலாய்க்கும் விதமாக இப்படம் உருவாகி இருக்கிறது என நெட்டிசன்களால் பேசப்பட்டு வந்தது.
குறிப்பாக விஜய் ரசிகர்கள் மற்றும் தொண்டர்கள் இப்படம் தவறாக விஜயை குறித்து சித்தரிக்கபட்டுள்ளதா என இணையத்தில் இயக்குனர் உமாபதியிடமம், நட்டியிடமம் கேள்வி எழுப்பி வந்தனர். அதற்கு பதிலளிக்கும் விதமாக நேற்று இப்படகுழுவினர் பத்திரிகையாளர் சந்திப்பில் அதற்கு முற்றுப்புள்ளி வைத்துள்ளனர். குறிப்பாக நடிகர் நடராஜன் இதற்கு வெளிப்படையாகவே பதிலளித்துள்ளார்.
இது குறித்து பேசிய நட்டி, “உமாபதி ஒரு கண்டிப்பான இயக்குநர் என்றே சொல்வேன். சில நட்புகள் நம் வாழ்நாள் முழுவதும் நீடிக்க வேண்டும் என ஆசைப்படுவோம். அப்படிப்பட்ட ஒருவர்தான் உமாபதி. இந்தப் படத்தின் டீசரை பார்த்து விட்டு நான் ஒருவர் மீது அவதூறு ஏற்படுத்துமாறு நடித்துள்ளேன் என கூறிவருகின்றனர். உண்மையாகவே நான் அப்படி செய்யவில்லை.
இந்த திரைப்படத்தின் நோக்கம் முழுவதுமே படத்தின் முதல் ஃப்ரேமிலிருந்து கடைசி ஃப்ரேம் வரை அனைவரும் சிரிக்க வேண்டும் என்பது தான். விஜய் சார் போல தோற்றம் வரும் இடங்கள் படத்தின் ஒரு சின்ன பகுதி தான். அதைத் தாண்டி படத்தில் இன்னும் நிறைய ஸ்வாரஸ்யமான கெட்டப்பில் நான் நடித்துள்ளேன்.
மேலும், விஜய் சார் ஒரு சிங்கம். அந்த சிங்கத்தை நான் அருகிலிருந்து பார்த்திருக்கிறேன். அவரை அப்படி டீஃபேம் செய்யக்கூடிய எண்ணம் எனக்கும், எங்களுடைய படக்குழுவுக்கும் கிடையாது. இந்த படம் பார்த்தால், நாங்கள் செய்திருக்கிற விஷயம் என்னவென்று உங்களுக்கு புரியும்.” என கூறியிருந்தார்.
